ಓ ನನ್ನ ಪ್ರೀತಿಯ ಗೆಳೆಯ
ಆಗಬಾರದೆ ನೀ ನಲ್ಮೆಯ ಒಡೆಯ
ಪ್ರತಿ ಕ್ಷಣ ಕಂಡಾಗ ನಿನ್ನ ನಯನ
ಪ್ರೀತಿಯ ಹೊಳೆಯಲ್ಲಿ ತೇಲಾಡಿತು ನನ್ನೀ ಮನ
ನಿನ್ನ ಹೃದಯದೊಳಗೆ ಸೆರಲೆಂದು ನಾ ಬಂದೆ
ಮನನೊಂದು ಕಣ್ಣೀರಿನ ಹೊಳೆಯಲಿ ನಾ ಬಿದ್ದೆ
ನಿನ್ನ ಸೇರೊ ಭರದಲ್ಲಿ ನನ್ನೆ ನಾ ಮರೆತು ಹೋದೆ
ಮಾತು ನಿನ್ನ ಹೊರತು ರುಚಿಸುವುದೇ..
ನೀ ಬಿಟ್ಟು ಅದೆಷ್ಟೋ ಕನಸುಗಳು, ನೆನಪುಗಳು ನನ್ನ ಕೊಂದು ಹಾಕಿತ್ತು..
ನಡೆದ ದಾರಿಗಳು ಕಾಯುವುದು ತಪ್ಪಿಲ್ಲ ..
ನಿನ್ನೆಯ ನೆನಪುಗಳ ಜೊತೆ ನಾಳಿನ ಬದುಕು..
ಪ್ರೀತಿಯ ಆಳ ಅರ್ಥವಾಗುವ ಮುಂಚೆ ಅರ್ಧವಾದ ಬದುಕು..
ಜೊತೆಯಲ್ಲಿ ಇದ್ದಾಗ ನಾಳಿನ ಕಲ್ಪನೆ ಕೂಡ ಇರಲಿಲ್ಲ ..
ಆದರೆ ಇಂದು ಅರಿತೂ ಅರಿಯಾಲಾಗದ ಪರಿಸ್ಥಿತಿ ....
ಬೇಕು ಅನ್ನುವ ಹಾಗಿಲ್ಲ ...ಬೇಕೆಂದರೂ ನೀ ಮತ್ತೆ ಸಿಗುವ ಹಾಗೆ ಕಾಣಿಸುತ್ತಿಲ್ಲ...
ಜೀವನ ಅಂದರೆ ಇಷ್ಟೇನೇ ಅದೊಂದು ಮುಗಿಯದ ಪಯಣದಂತೆ...
ಮುಗಿದ ಹಾಗೆ ಕಂಡರೂ ನಾವು ಮಾತ್ರ ಮುಂದಕ್ಕೆ ಸಾಗಲೇಬೇಕು...
ದಾರಿ ಕಾಯುತ್ತಾ ಕುಳಿತ್ತಿದ್ದೇನೆ
ದಾರಿಯ ಮಧ್ಯದಲ್ಲಿ ನಿನಗಾಗಿ
ನೀನು ಬರುವೆಯೆಂದು-ಬೇಗ ಬಾರೆಂದು
ಸುತ್ತಲೂ ತಿಳಿನೀಲಿಯಾಕಾಶ
ಮನದಲ್ಲಿ ನೂರು ಯೋಚನೆಗಳು,ಯಾಚನೆಗಳು;
ಈ ಕ್ಷಣದಲ್ಲಿ ನೀನು ನನ್ನ ಮುಂದಿದ್ದರೆ ಎಂಬ ಆಲೋಚನೆ;
ಎಲ್ಲವೂ ಮನದಲ್ಲಿ ಪುಳಕ ನೀನು ಬರುವೆಯೆಂದು
ತಂಗಾಳಿಯ ಸೌರಭ,ಸಂಜೆಯ ಸೂರ್ಯಕಿರಣಗಳು
ಕಾತರತೆಯ ಜೊತೆಗೆ ವಿರಹವನ್ನೂ ಹೆಚ್ಚಿಸಿದೆ
ಕಾತರತೆಯ ವಿರಹದಲ್ಲಿ ಬೇಯುತ್ತಾ ನಿನಗಾಗಿ ಕಾಯುತ್ತಿದ್ದೇನೆ
ಕಾತರತೆಯಲ್ಲಿಯೇ ನನ್ನ ಸುಖವನ್ನು ಕಾಣುತ್ತಿದ್ದೇನೆ
ಜೀವನ ಮೊದಲಿಗಿಂತಲೂ ಆಸಕ್ತಿದಾಯವಾಗಿದೆ-ಕಾತರತೆಯಿಂದ;
ಕಾಯುವ ಮನಸ್ಥಿತಿಯಲ್ಲಿರುವ ಸುಖ ಕಾಯುವವನಿಗೇ ಗೊತ್ತು;
ಅರಳುವ ಹೂವುಗಳ ಜೊತೆಯಲ್ಲಿ
ಅರಳುತಿರುವ ನನ್ನ ಸುಂದರ ಮನಸು
ಅಂತರಾಳದಲಿ ಹುದುಗಿರುವ
ನೆನಪುಗಳನು ಕೆದಕಿದೆ.
ಅದೆಂದೋ ಆದ ಘಟನೆ
ಕಣ್ಣಂಚಿನಲಿ ನರ್ತಿಸುತ್ತಿದೆ
ಮೂರಗಲ ಮನಸಿನಲಿ
ಊರಗಲ ಕನಸುಗಳ ಹಾಸಿ.
ಅಭಯ ನೀಡಿದವರ ನೆನಪು
ಧೈರ್ಯ ತುಂಬಿದವರ ನೆನಪು
ಸುಮಧುರ ಬಾಂಧವ್ಯ ಬೆಸೆದ
ಸಹೋದರಿಯ ನೆನಪು…
ನಿಟ್ಟುಸಿರಿನಲಿ ಪಟಬಿಚ್ಚಿ ತೇಲುತ್ತಿದೆ.
ಶಾಲೆ, ಕಾಲೇಜಿನಲಿ ಕಳೆದ ಕ್ಷಣಗಳ
ಸವಿನೆನಪು, ಬಾನಂಗಳದಲಿ
ಚಿತ್ತಾರ ಮೂಡಿದಂತೆ ಚಿಗುರೊಡೆದಿದೆ
ಅಕ್ಕರೆಯ ಅಪ್ಪುಗೆಯನು ನೀಡಿ.
ಶಾಂತವಾಗುತ್ತಿದೆ ಮನಸು..ನೆನಪೆಂಬ
ಸಂಕೋಲೆಗಳ ಕೊಂಡಿಗಳನು ಕಳಚುತ್ತಾ,
ಸುಮ್ಮನೆ ಕುಳಿತಿದ್ದೇನೆ ನಾನು
ಏನೂ ಮಾಡಲಾಗದಂತೆ…
ಹಳೆಯ ನೆನಪುಗಳ ಜೊತೆ ಹರಟುತ್ತಾ.
ಬರೆವ ಪದಗಳೆಲ್ಲ ಕವನವಾಗು ವಂತಿದ್ದರೆ...!!
ಅರಳಿದ ಹೂವುಗಳೆಲ್ಲ ದೇವರ ಪಾದ ಸೇರುವಂತಿದ್ದರೆ...!!
ಕಂಡ ಕನಸೆಲ್ಲ ನನಸಾಗುವ ಆಗಿದ್ದರೆ....ಬೇಕು ಎನಿಸಿದೆಲ್ಲ ಸಿಗುವಂತಿದ್ದರೆ...!!
ಅವಕ್ಕೆ ಇರಬೇಕಾದ ಮೌಲ್ಯ ಇರುತಿತ್ತೇ....?
ಕಷ್ಟ ಇಷ್ಟ ಗಳ ನಡುವಿನ ಅಂತರ ತಿಳಿಯುತಿತ್ತೆ....?
ಪ್ರೀತಿಸಿದ ಎಲ್ಲರಿಗೂ ಪ್ರೀತಿ ಸಿಗುವಂತಿದ್ದರೆ...ಕಾಯುವಿಕೆಗೆ ನೋಯುವಿಕೆಗೆ ಅರ್ಥ ಇರುತಿತ್ತೆ...?
ಪ್ರೀತಿಯ ಮೌಲ್ಯ ಎಲ್ಲರಿಗೂ ಅರಿವಾಗುತಿತ್ತೆ....?
ವಿರಹದ ಬೇಗೆಯ ಅನುಭವದ ಅರಿವು ನಮಗಾಗುತಿತ್ತೆ...?
ಭೂಮಿಯ ಮೇಲೆ ಜನಿಸಿದ ಎಲ್ಲರಿಗೂ...ತಂದೆ ತಾಯಿಯ ಪ್ರೀತಿ ಸಿಗುವಂತಿದ್ದರೆ...!!
ಬಂಧು ಬಳಗದ ನಂಟು ಸಿಗುವಂತಿದ್ದರೆ...!!
ಆ ಮಮತೆಯ ವಾತ್ಸಲ್ಯದ ಬೆಲೆ ತಿಳಿಯುತಿತ್ತೆ....? !!