ನನಗೋ ಮುಗಿಲೆತ್ತರಕೆ ಏರುವಾಸೆ
ಮಳೆಹನಿಗೆ ಭೂಮಿಗೆ ಮುತ್ತಿಡುವಾಸೆ
ಭೂಮಿಯ ಮಡಿಲ ಸೇರುವ ಹನಿ ಮತ್ತೆ ಬರಬಹುದು ಅಂತರ್ಜಲವಾಗಿ
ಮುಗಿಲಿಂದ ಎತ್ತರಕ್ಕೆ ಹಾರಿದ ನಾನು ಬರಬಹುದೇ ಮತ್ತೆ -?
ಮುಗಿಲ ಮಡಿಲಿಂದ ಬರುವ ಹನಿ ಪರಿಶುಧ್ಧ
ಮುಗಿಲಿಂದ ಮೇಲೆ ಏರಿದ ನನ್ನಾತ್ಮ ಎಷ್ಟುಶುದ್ಧ
ಹೋಲಿಸಬಹುದೇ ನನ್ನನ್ನು ಮಳೆ ಹನಿಗೆ
ಮೇಲಿಂದ ಕೆಳಗೆ ಬಂದ ಹನಿಯದು ಸಾರ್ಥಕ್ಯದ ಭಾವ
ಕೆಳಗಿಂದ ಮೇಲಕ್ಕೆ ಹಾರಿದ ನನ್ನದು ತೀರದ ಸ್ವಾರ್ಥದ - ?
ಸ್ವಾರ್ಥದ ಆತ್ಮ ನರನದಾದರೆ
ನಿಸ್ವಾರ್ಥದ ಹನಿ ಪರಮಾತ್ಮನ ಕರುಣೆ
ಆತ್ಮ ಹನಿಯಾಗ ಬೇಕಾದರೆ ಬೆತ್ತಲೆಯಾಗು ಮನುಜ
ಅರಿಷಡ್ವರ್ಗಗಳ ಪರದೆಯ ಸರಿಸಿ
ರಾಗ ದ್ವೇಷಗಳ ಕಳೆಯ ಸುಟ್ಟು, ಸ್ನೇಹ ಪ್ರೀತಿಯ ಹಣತೆಯ ಹಚ್ಚಿ.
ಕಲ್ಪನೆಯ ಲೋಕದಲ್ಲಿ ಸಾಗಿ,
ಸಾವಿರ ಕನಸುಗಳ ಕಂಡು,
ಇಲ್ಲ ಸಲ್ಲದ ಭ್ರಮೆಯಲ್ಲಿ ಮುಳುಗಿ,
ಪ್ರಪಂಚವನ್ನೆಲ್ಲ ತನ್ನದೆಂದುಕೊಂಡು,
ಸುಂದರ ಕನ್ಯೆಯರೊಂದಿಗೆ ಸರಸವಾಡಿ,
ಸಿರಿವಂತಿಕೆಯಲಿ ಅಹಂಕಾರವ ಮೆರದು,
ದರ್ಪದಿಂದ ತಾನೇ ಶೂರನೆನುತಿರಲು,
ಥಟ್ಟನೆ ನೆನಪಾಗುವುದು ವಾಸ್ತವ ಲೋಕ,
ಬೇಡವೆಂದರೂ ಕಾಣುವುದು ಕಟು ಸತ್ಯ,
ಒಪ್ಪಿಕೊಳ್ಳಲೇಬೇಕು ಈ ಕಟು ಸತ್ಯ.
ಅವಳ ಮೊದಲ ಮುಟ್ಟು ನಿಂತಾಗ
ಗಂಡನಲ್ಲಿ ಹುಟ್ಟುವ ಅಸಂಖ್ಯ
ಆಸೆಗಳಿಗೆ ಹೆಸರೇನೂ ಇರುವುದಿಲ್ಲ
ಸ್ತ್ರೀ ಸಮುದಾಯವೇ,
ಇವ ಯಾವತ್ತೂ ದೇವರಾಗಬಲ್ಲ ಕಲ್ಲು
*
ಹೊಟ್ಟೆ ಉಬ್ಬುವ ಪ್ರತಿದಿನವು
ಮನಸ್ಸಿನಲ್ಲಿ ಲೆಕ್ಕ ಹಾಕುತ್ತಾನೆ
ತನ್ನದೇ ಪ್ರತಿರೂಪ ಹುಟ್ಟಬೇಕೆಂಬ
ಇರಾದೆ ವ್ಯಕ್ತಪಡಿಸದೇ ಇರಿಸಿಕೊಳ್ಳುತ್ತಾನೆ
*
ನೀವು ಕೂಸಿನಿಂದ ತಿನ್ನುವ ಪ್ರತಿ
ಒದೆಗೂ ಎದೆ ನೀಡಬೇಕೆಂದು
ಆಶಿಸುವವನು ಇವನೇ
ಮಹಿಳೆಯರೇ
ನಿಮ್ಮ ನೋವ ನೋಡಿ ನಗುವುದಲ್ಲ ಅವನು
ತನ್ನ ಕಂದನ ಪರಾಕ್ರಮಕ್ಕೆ ಮುಗುಳುತ್ತಾನೆಯಷ್ಟೇ
*
ಹೆರಿಗೆ ವಾರ್ಡಿನಲ್ಲಿ ನಿಮ್ಮ ಯಾತನೆ
ಡೆಲ್ಟಾ ಮಾಪಕದಲ್ಲಿ ಅಳೆಯುತ್ತಾರೆ
ಗರ್ಭಧಾರಿಣಿಗಳೇ,
ಹಾಸು ಬೆನ್ನಿಗೆ ಮುತ್ತನಿಟ್ಟ ಇವನ
ದರ್ದು ಅಳೆಯುವ ಮಾಪಕ
ಇನ್ನೂ ಕಂಡುಹಿಡಿದಿಲ್ಲ..!!