Kannada Poems
ಚಂದಿರನ ಊರಿನಲ್ಲಿ
ಚಂದನದ ಗೊಂಬೆಯು!!
ಹುಣ್ಣಿಮೆಯ ರಾತ್ರಿಯಲ್ಲಿ
ಬೆಳದಿಂಗಳ ತಂದಳು!!
ನನ್ನ ಎದೆಯ ಬಾಗಿಲನ್ನು
ಬಡಿಯುತಲಿ ನಿಂತಳು!!
ನಾ ನೋಡುತ ಬೆರಗಾದೆ
ತೆರೆಯದೇ ಬಾಗಿಲು!!
ಅವಳ ಕಣ್ಣ ಸವಿ ನುಡಿಗಳ
ಪರಿ ತಿಳಿಯದೇ ಹೋದೆನು!!
ಮನಸಿಗೆ ಬೀಗ ಜಡಿದು
ಮೌನವಾಗಿ ಕುಳಿತೆನು!!
ಕಾದು ಕಾದು ಸಾಕಾಗಿ
ಅವಳು ತಿರುಗಿ ಹೋದಳು!!
ಎಚ್ಚೆತ್ತ ಮನಸು ಈಗ
ಹೋದವಳಿಗಾಗಿ ಬಯಸಿದೆ!!
- ಪಿ.ಜಿ.ಜ್ಯೋತಿ
09 Aug 2017, 05:30 pm
ಮುಗಿಲಿನ ಅಂಚಿಗೆ ಬಣ್ಣವ ಬಡಿಯುವ
ಕಾಯಕ ದೊರೆಯಿತೇ ಅವನಿಗೆ!!
ದೂರಕೆ ದೂರಕೆ ಹೋದವನು ಅವನು
ಹಿಂದಿರುಗಿ ಬರದಾದನೇ ಮನೆಗೆ!!
ಬಾಗಿಲ ಎದುರಲಿ ಕಾಯುತ ಕುಳಿತೆನು
ಅವನ ಆಗಮನಕ್ಕೆ ನಾನು!!
ಬಲುದೂರದಲಿ ಮುಗಿಲಿನ ಅಂಚು
ಕೊನೆ ಇಲ್ಲದೆಯೇ ಎಲ್ಲೆಡೆ ಹರಡಿದೆ!!
ಕಾಯಕ ಮುಗಿಸಿ ಮರಳುವನು ಎಂಬ
ಬರವಸೆಯ ಗೋಪುರ ಅಳಿಸಿದೆ!!
ಎಷ್ಟೇ ಯತ್ನಿಸಿದರೂ ನಿಲ್ಲದ ಗೋಪುರವ
ಮತ್ತೆ ಮತ್ತೆ ಕಟ್ಟಲು ನಾ ಯತ್ನಿಸಿದೆ!!
- ಪಿ.ಜಿ.ಜ್ಯೋತಿ
09 Aug 2017, 05:29 pm
ಈ ಹಾಡು ನನ್ನದು ಈ ನಾಡು ನನ್ನದು
ಈ ಭಾಷೆ ನನ್ನದು ಎಂಬ ಹಿರಿಮೆ ನನ್ನದು!!
ಈ ಹಾವ ನನ್ನದು ಈ ಭಾವ ನನ್ನದು
ಕರುಣೆಗೆ ಹೆಸರಾಗಿಹ ಕರುನಾಡು ನನ್ನದು!!
ಈ ವೇಷ ನನ್ನದು ಈ ಲಾಸ್ಯ ನನ್ನದು
ಈ ರೀತಿ ನೀತಿ ವಿಧಿ ವಿಧಾನ ಎಲ್ಲ ನನ್ನದು!!
ಈ ಗಾಳಿ ನನ್ನದು ಈ ನೀರು ನನ್ನದು
ಈ ಮಣ್ಣು ನನ್ನದು ಎಂಬ ಗರಿಮೆ ನನ್ನದು!!
ಈ ತನುವು ನನ್ನದು ಈ ಮನವು ನನ್ನದು
ನರ ನಾಡಿಯಲ್ಲಿ ಹರಿಯುತ್ತಿರುವ ರಕ್ತ ನನ್ನದು!!
ಈ ವಿಚಾರ ನನ್ನದು ಈ ಆಚಾರ ನನ್ನದು
ಇಲ್ಲಿ ಹುಟ್ಟಿ ಇಲ್ಲಿ ಬೆಳೆದ ಬದುಕು ನನ್ನದು!!
ಈ ಬರಹ ನನ್ನದು ಈ ಕವಿತೆ ನನ್ನದು
ಈ ಸಾಲಿನಲ್ಲಿ ಬೆರೆತಿರುವ ಅಭಿಮಾನ ನನ್ನದು!!
ಈ ಹಾಡು ನನ್ನದು ಈ ನಾಡು ನನ್ನದು
ಈ ಭಾಷೆ ನನ್ನದು ಎಂಬ ಹಿರಿಮೆ ನನ್ನದು!!
- ಪಿ.ಜಿ.ಜ್ಯೋತಿ
09 Aug 2017, 09:27 am
ಮರಳಿ ಮರಳಿ ಏಕಾಂತ
ನನ್ನನೇ ಹುಡುಕಿ ಬರುತಿದೆ ಏಕೆ!!
ಕೊರಗಿ ಕೊರಗಿ ನಾನಿಲ್ಲಿ
ಕೂರಲು ಅದಕೆ ಸಂತಸವೇ!!
ನಿದಿರೆಯಲ್ಲೂ ಕನಸಿನ ಬಾದೆ
ಒಂಟಿಯಾಗೇ ಕಾಡಿದೆ ನನ್ನ!!
ಹಗಲಿನಲ್ಲೂ ಏಕಾಂತದ ಸಲಿಗೆ
ಅಂತರವಿಲ್ಲದೇ ಅಂಟಿದೆ ನನ್ನ!!
ಮರಳುಗಾಡಿನಲ್ಲಿ ಕಾಲು ಮುರಿದು
ಕುಳಿತವನ ಚಿಂತೆ ಅರಿತವರಾರು!!
ಏಕಾಂತದಲ್ಲಿ ನೊಂದವನಿಗೆ
ಸಾಂತ್ವನ ನೀಡುವವರಾರು!!
ಬೆಂಕಿಗೆ ಆಹುತಿಯಾಗಿ ಕರಗುತ್ತಿರುವ
ಮೇಣದಂತಹ ಬದುಕು ಇದು!!
ಚೂರು ಬೆಳಕ ಕಂಡ ಸಂತಸದಲ್ಲಿ
ಬದುಕನ್ನು ಬಲಿ ಪಡೆಯುತ್ತಿದೆ!!
ಸರಾಗವಾಗಿ ಹರಿಯುತ್ತಿರುವ
ಕಣ್ಣೀರಿಗೇನು ಕೊರತೆ ಕಣ್ಣಲ್ಲಿ!!
ಒಂಟಿಯಾದ ಮನಸಿನ ರೋದನೆ
ಮುಗಿಲಿಗೂ ಮಿಗಿಲಾದ ವೇದನೆ!!
- ಪಿ.ಜಿ.ಜ್ಯೋತಿ
09 Aug 2017, 09:16 am
ನನ್ನ ತವರೂರು ಬಲು ದೂರ ಗೆಳತಿ
ಅಲ್ಲಿ ನನ್ನ ತಾಯಿ ಮನೆ ಆಳೋ ಒಡತಿ!!
ಕಣ್ಣ ಮುಂದಿರುವ ಆ ತಾಯಿ ಮಮತೆ
ನನ್ನ ಕರೆದಿಹುದು ಬಾ ಕಂದ ಎನುತ!!
ಹೆತ್ತ ತಾಯಿಗೆ ನಾ ಮಡಿಲ ಮಗುವಾಗಿದ್ದೆ
ನಕ್ಕು ನಗಿಸುತ್ತ ನಾ ದಿನ ನಲಿಯುತ್ತಿದ್ದೆ!!
ಚಪ್ಪರಕ್ಕೆ ಉಯ್ಯಾಲೆ ಕಟ್ಟಿ ಜೀಗುತ್ತಿದ್ದಳು
ತಾಯಿ ನಗು ನಗುತ ನನ್ನನ್ನು ಅಪ್ಪಿ!!
ಅಂಗಳದ ರಂಗೋಲಿಯಲ್ಲಿ ಅಂದು
ಬಾನ ಚಂದಿರನ ಕರೆತರಲು ನನ್ನ ವಿಲಾಪ!!
ಬಾನಿಗೆ ಮುಖವೊಡ್ಡಿದ ಕನ್ನಡಿಯ ಒಡನೆ
ಬಾನ ಚಂದಿರನ ಆಗಮನದ ಸಂಭ್ರಮ!!
ಇರುಳಿನಲ್ಲಿ ಭಯಗೊಂಡು ಅತ್ತಾಗ
ತಾಯಿ ಎದೆಗೆ ಒರಗಿ ಪಡೆದಂತಹ ಸಾಂತ್ವನ!!
ತಾಯಿ ಮಡಿಲಲ್ಲಿ ಮಲಗಿರಲು ನಾನು
ಅವಳ ಜೋಗುಳದ ಪರಿ ಹೇಳತೀರದು!!
ಅವಳನು ನೋಡಲು ಕಾದ ನನ್ನ ಕಂಗಳು
ನೆನೆದಾಗ ಕಂಬನಿಯ ತಾ ಮಿಡಿದಿವೆ!!
ದೂರ ಇರುವ ನನ್ನ ತವರೂರಿಗೆ ನಾನು
ಇಂದು ಹೊರಟಿರುವೆ ಸಂಭ್ರಮದಿ ಗೆಳತಿ!!
- ಪಿ.ಜಿ.ಜ್ಯೋತಿ
09 Aug 2017, 08:52 am
ಇನಿಯ ನಿನ್ನ ಪ್ರೀತಿಯ
ಸಿರಿತನವನು ಕಂಡು
ಕಡಲಿನ ಆಳದ ಮುತ್ತಿಗೂ
ಬಂದಿತೇ ಬಡತನ!!
ಒಲ್ಲೆ‌ನೆಂದರೂ ಮನಸು
ಬಲವಂತವಾಗಿ ಸೆಳೆದು
ಬಯಸಿತೇ ನಿನ್ನ ಅಂತರಂಗದ
ಮುಗ್ಧ ಪ್ರೀತಿಯನ್ನು!!
ಕತ್ತಲ ಕಾನನದ ತುಂಬೆಲ್ಲ
ಹಣತೆಯನ್ನು ಬೆಳಗಿಸಿ
ಸಂಭ್ರಮಿಸ ಬಯಸಿತೇ
ನನ್ನ ಈ ಹುಚ್ಚು ಮನಸು!!
ಎತ್ತಲೋ ಓಡಿದ ಭಾವವನ್ನು
ಹಿಂದಿರುಗಿ ಕರೆಯುವ
ಮನಸಿಲ್ಲದೇ ಹೃದಯದಲ್ಲಿ
ಹೊಸದಾಗಿ ಹುಟ್ಟಿತೇ ಪ್ರೀತಿ!!
- ಪಿ.ಜಿ.ಜ್ಯೋತಿ
09 Aug 2017, 08:52 am
ಅವನಿಗೆ ಅವಳದೇ ನೆನಪು
ಅವಳಿಗೂ ಅವನಲಿ ಮನಸು!!
ಚಿಗುರೊಡೆದಿಹ ಹೊಸ ಪ್ರೀತಿ
ಗರಿಗೆದರಿದೆ ಇಬ್ಬರ ಒಳಗೂ!!
ನವಿರಾಗಿಹ ನವ ಭಾವನೆ ತುಂಬಿ
ನಲಿದಾಡಿದೆ ಇಬ್ಬರ ಮನಸು!!
ಈಜಾಡುತ ಹೃದಯದ ಒಳಗೇ
ಖುಷಿ ಪಡುತಿದೆ ಎಲ್ಲೋ ಅಡಗಿ!!
ಅತಿಯಾಗಿಹ ಈ ಹೇಳದ ಪ್ರೀತಿ
ಅನುಭವಿಸುತ್ತಿದೆ ವಿರಹದ ಬೇಗೆ!!
ಹಿತ ನೀಡುವ ಮನಸನು ಬಯಸಿ
ಚಡಪಡಿಸುತ್ತಿದೆ ಒಳಗೊಳಗೇ!!
- ಪಿ.ಜಿ.ಜ್ಯೋತಿ
09 Aug 2017, 08:51 am
ಕಲ್ಲಾದವನ ಮನವನು ಕರಗಿಸಿ
ಹೂವಾಗಿಸುವ ಬಗೆ ನೀ ತಿಳಿಸು!!
ಹೇಗಾದರೂ ನಾ ಕಲ್ಲನು ಕರಗಿಸಿ
ವಲಿಸಿಕೊಳ್ಳುವ ಬಗೆ ನೀ ತಿಳಿಸು!!
ಎಲೆ ಮಾನವ ಈ ಮನವಿ ಸತ್ಯವು
ನಿನಗಾಗಿ ಕಾದು ಕುಳಿತ ಕ್ಷಣ ನಿತ್ಯವು!!
ಭಾರವಾದ ನನ್ನ ಈ ಮನಸಿನ್ನು
ಹಗುರಾಗಿಸುವ ಬಗೆ ನೀ ತಿಳಿಸು!!
ನೋವ ನುಂಗಿ ಸುಖವ ಹಂಚಿ
ನಯವಾಗಿಸುವ ಬಗೆ ನೀ ತಿಳಿಸು!!
ಎಲೆ ಮಾನವ ಈ ಮನವಿ ಸತ್ಯವು
ನಿನಗಾಗಿ ಕಾದು ಕುಳಿತ ಕ್ಷಣ ನಿತ್ಯವು!!
ಅವನ ಉಸಿರಿನಲ್ಲಿ ನನ್ನ ಉಸಿರನ್ನು
ಬೆರೆಸಿ ನಲಿವ ಬಗೆ ನೀ ತಿಳಿಸು!!
ಉಸಿರು ನಿಲ್ಲುವ ಮೊದಲು ಅವನನ್ನು
ವಲಿಸಿಕೊಳ್ಳುವ ಬಗೆ ನೀ ತಿಳಿಸು!!
ಎಲೆ ಮಾನವ ಈ ಮನವಿ ಸತ್ಯವು
ನಿನಗಾಗಿ ಕಾದು ಕುಳಿತ ಕ್ಷಣ ನಿತ್ಯವು!!
- ಪಿ.ಜಿ.ಜ್ಯೋತಿ
09 Aug 2017, 08:51 am
ರತ್ತೋ ರತ್ತೋ ರಾಯ ನೀನು
ಬರುವೆಯೇನು ಇಲ್ಲಿಗೆ!!
ಬಿತ್ತೋ ಬಿತ್ತೋ ಪ್ರೇಮದ ಬೆಳೆಯ
ನನ್ನ ಹೃದಯದ ಹಿತ್ತಲಿಗೆ!!
ಒಂಟಿಯಲ್ಲ ನಾನು ಇಲ್ಲಿ
ನೀನು ಜೊತೆಗೆ ಇರುವಾಗ!!
ಜಂಟಿಯಾಯ್ತು ಮನಸು ಇಲ್ಲಿ
ಪ್ರೇಮ ಮೊಳಕೆ ಒಡೆದಾಗ!!
ಹೊಸ ಆಸೆ ಚಿಗುರಿತು ಈಗ
ನಿನ್ನ ಕೂಡಿ ನಲಿವಾಗ!!
ಸ್ಥಿರವಾಯ್ತು ಪ್ರೇಮ ಹೃದಯದಿ
ಬೇರೂರಿ ಕುಳಿತಾಗ!!
ತಂಪಾದ ತಂಗಾಳಿ
ನನ್ನ ಉಸಿರಿಂದ ಹೊರಬಂತು!!
ಪ್ರೇಮದ ಮರವು ಇಂದು
ಹಸಿರಾಗಿ ಬೆಳೆದು ತಾ ನಿಂತಾಗ!!
ನಿನ್ನ ಪ್ರೇಮದೊಲವಿನ ಬೆಸುಗೆ
ನನ್ನ ಒಳಗೆ ಬೆಸೆದಾಗ!!
ನನ್ನ ಸನಿಹದ ಮೋಹದ ಸಲಿಗೆ
ನಾ ನೀಡುವೆ ನಿನಗೆ!!
- ಪಿ.ಜಿ.ಜ್ಯೋತಿ
09 Aug 2017, 08:51 am
ನನ್ನ ಜೀವಕೆ ಉಸಿರು ನಿನ್ನದೇ
ನನ್ನ ಹೃದಯದಿ ನಿನ್ನ ಹೆಸರಿದೆ!!
ಉಸಿರ ಹೆಸರಲಿ ಪ್ರೀತಿ ಬೆರೆತಿದೆ
ನಿನ್ನ ನೆನೆಯುತ ನಾನು ಬದುಕಿದೆ!!
ಕರುಣೆ ಇಲ್ಲದೇ ನೀ ನನ್ನ ದೂರಿದೆ
ಉಸಿರು ನಿಲ್ಲಿಸಿ ನೀ ದೂರ ಸರಿದೆ!!
ನನ್ನ ಸನಿಹ ನೀ ಬರಲಾರದೇ
ಇಂದು ಹೀಗೇಕೆ ಜಡವಾಗಿ ಹೋದೆ!!
ಪ್ರಶ್ನೆ ನಾ ಕೇಳಲು ಉತ್ತರ ನೀಡದೇ
ಹೇಳು ಯಾಕಾಗಿ ನೀ ಮೌನಿಯಾದೆ!!
ಕಣ್ಣು ಕಂ‌ಬ‌ನಿಯನು ತಾ ಮಿಡಿಯುತ
ಹಂಬಲಿಸಿ ಕೇಳಿದೆ ನಿನ್ನ ಉಸಿರನು!!
- ಪಿ.ಜಿ.ಜ್ಯೋತಿ
09 Aug 2017, 08:50 am