ಬೆಳಗ್ಗೆ ಎದ್ದು ಅಂಗಳ ಗುಡಿಸಿ
ಗಂಡನ ಪ್ಯಾಂಟ್ ಜೇಬ್ ಎಲ್ಲ ಹುಡ್ಕಿ
ಮೆಂತೆ ಡಬ್ಬ ಎಲ್ಲಾ ತಡ್ಕಿ
ಹಾಲಿನ ಪಾಕೆಟ್, ಕೊತ್ತಂಬರಿ ಸೊಪ್ಪು
ಕೊಬ್ಬರಿ ಎಣ್ಣೆ, ಟಾಟಾ ಉಪ್ಪು,
ರೆಡ್ ರೋಸ್ ಟಿಪುಡಿ, ಕಾಲ್ ಕೆಜಿ ಸಕ್ರೆ,
ಅರ್ಧ ಗಂಟೆ ಅದು ಇದು ಮಾತು,
ಎದುರು ಮನೆಯೋಳು ಅಲ್ಲೇ ಸಿಕ್ರೆ.
ಕರಿಬೇವು ಇಲ್ಲ, ಪುಳಿವೋಗರೆ ಗೊಜ್ಜು
ಗಡಿಬಿಡಿಯಲ್ಲಿ ಕೆಲಸಕೆ ಸಜ್ಜು.
ಕೇಳೋರಿಲ್ಲ ಕರೆಂಟು ಬಿಲ್ಲು
ರೇಷನ್ ಅಂಗ್ಡಿಲಿ ಸಾಲಾಗಿ ನಿಲ್ಲು.
ಚೀಟಿ ದುಡ್ಡು ಹೊಂದಿಸಿ ಕಟ್ಟು
ಚಪ್ಪಲಿ ತಗೋಬೇಕು ಎರಡ್ ದಿನ ಬಿಟ್ಟು.
ಮಕ್ಕಳ ಸ್ಕೂಲ್ ಫೀಸ್ ಕಟ್ಲೇಬೇಕು
ಇದ್ದುದರಲ್ಲೇ ಜೀವನ ನೂಕು.
ಅನ್ನ ಸಾರು, ಒಣ ಮಿನ್ ದಿವಸ
ಹಬ್ಬ ಬಂದ್ರೆ ಮಾಡು ಪಾಯ್ಸ.
ಹೆಣ್ಣೆಂಬ 'ಪದಕೆ' ಅತೀ ಬೇಡಿಕೆ
ಅವಳ ಬಗೆಗೆ ಭಾಷಣಗಳಲಿ ಭಾರಿ ಹೊಗಳಿಕೆ
ಅವಳೇ ಆಗ ಜಗದಲಿರುವ ದೇವ ಕನ್ನಿಕೆ
ಮನದಲಿ ಹುಟ್ಟುವ ಕಾವ್ಯಕ್ಕೆಲ್ಲ ಅವಳೇ ಮಾಲಿಕೆ
ನಿಜದಲ್ಲಿ ಅನಿಷ್ಟಕ್ಕೆಲ್ಲ ಅವಳೆ ಕಾರಣ ಎಂಬ ಹೇರಿಕೆ
ಸಿಕ್ಕ ಸಿಕ್ಕಲೆಲ್ಲ ಅವಳ ಮೇಲೆ ಕಂತೆ ಕಂತೆ ತೆಗಳಿಕೆ
ಏತಕೆ ಮಾತಿನಲಿ ಅವಳ ಮೇಲೆ ಕಾಳಜಿಯ ತೋರಿಕೆ
ಇಟ್ಟಿದ್ದವೇನು ನಮ್ಮನ್ನು ಮಾತಲ್ಲಿ ಉದ್ದರಿಸಿರೆಂದು ಬೇಡಿಕೆ
ಬೇಡಿಬಂದಿಲ್ಲ ನಾವು ನೀವು ಕೊಡುವ ದೆವ್ವ ದೇವರ ಪಟ್ಟಕ್ಕೆ
ಮೀರಿ ಹೋಗಬಲ್ಲೆವು ಹೆಣ್ಣೆಂದು ಎಳೆದಿರುವ ಅಂಕೆ ಶಂಕೆ
ನಮ್ಮೊಳಗೂ ನೋವುಂಟು, ಇಡೀ ಜಗಕ್ಕೇನೆ ಹಂಚುವುದಕ್ಕೆ
ಕನಸು,ಕಣ್ಣೀರ ಕೂಡಿಟ್ಟು ಬದುಕುವೆವು ಇನ್ಯಾರ ನಗುವ ನೋಡುವುದಕ್ಕೆ
ಹೆಣ್ಣ ಮೇಲೆಯೇ ಎರಗುವರು ಯಾರುಯಾರದೊ ದ್ವೇಷಕ್ಕೆ
ಹೆಣ್ಣಿನ ಮಾನ‌ಹರಣವೆ ಸರಕಾಯಿತಲ್ಲ ಹಲವು ಯುದ್ಧ ಗೆಲುವುದಕ್ಕೆ
ಕೊಡುವರು ಸುಖದುಃಖ, ಕಷ್ಟನಷ್ಟ, ಏಳುಬೀಳು ಎಲ್ಲದಕ್ಕೆ ಮೂಲವೆಂಬಂತೆ ಹೋಲಿಕೆ
ಅವಳಾಗಿರುವಳು ಆಡಲು ಸಿಗುವ ಕಾಲ್ಚೆಂಡಿನಂತೆ ಏತಕೆ
ನಿಮ್ಮಲ್ಲಿ ನಮ್ಮೆಲ್ಲರದ್ದು ಒಂದು ಸಣ್ಣ ಕೋರಿಕೆ
ನಮಗಿಲ್ಲ ದೇವರು ದೇವತೆಯಂಬ ಪಟ್ಟದ ಬಯಕೆ
ಬೆಳಕಿಲ್ಲದ ಕತ್ತಲೊಳಗೆ ಪೂಜಿಸದರೆ ಹೊಗಳಿದರೆ ಸಾಕೆ
ಸಾಕೆಮಗೆ ನೀವು ಹೆಣ್ಣಿಗೂ ಮಾನವಳ ಸ್ಥಾನ ನೀಡಿ ತೋರಿದರೆ ಹೆಗ್ಗಾರಿಕೆ
ನಿನಗಾಗಿಯೆ ಒಂದು ಪ್ರೀತಿಯ ಓಲೆಯ
ಬರೆಯಬೇಕೆನಿಸುತ್ತದೆ ದೂರಾಗಿರುವ ಇನಿಯ
ಹೊರಗಿಣುಕಿದಾಗಲೆಲ್ಲ ಒಳದನಿ
ನಡುಗುವುದು ಕೈಯಲ್ಲಿಡಿದ ಲೇಖನಿ
ಗೀಚಿತ್ತು ಹರುಷದಲೆ ನೂರಾರು ಪ್ರೇಮಪತ್ರ
ನಾ ಸೇರಿ ನಗುತ ಬಾಳಬೇಕೆಂದು ನಿನ್ನ ಹತ್ರ
ಈಗ ಕಂಡಾಗ ಕಣ್ಣಾಲಿಯಲಿ ನಿಂತ ನೀರ ಹನಿ
ಸುರಿಸುತಿದೆ ಆ ಲೇಖನಿಯು ನೋಯುತ ಕಂಬನಿ
ಆ ಎಲ್ಲ ಸವಿ ನೆನಪುಗಳು ಕಾಡುವ ಘಳಿಗೆ
ತೆರೆಯುವುದು ನನ್ನೆದೆಯೊಳಗೆ ನೋವಿನ ಮಳಿಗೆ
ಸಿಗಬಹುದು ಯಾರಾದರು ಕೊಡುವವರು ನಗುವಿನ ಗುಳಿಗೆ
ಆದರೆ ನೀನೆನೆ ಮೊದಲು ಕೊನೆ ಪ್ರೇಮದೊಲವಿನ ಬಾಳಿಗೆ
ಕಾಯುವೆನು ನಿನಗಾಗಿ ಆಗಲಿ ಎಷ್ಟಾದರು ವರುಷ
ನೀನಿದ್ದರೆ ನಗುತ ಜೊತೆಗೆ ಬಾಳ‌‌ಲಿ ನನಗದೆ ಹರುಷ
ನಿನ್ನ ನೆನದಾಗಲೆಲ್ಲ ಸುರಿವುದು ಕಣ್ಣಲಿ ಕಣ್ಣೀರನಿಯ ವರ್ಷ
ನಿನಗಾಗಿ ಬರೆದ ಕಾಗದ ಮಸುಕಾಗಿದೆ, ತಾಗಿ ಕಣ್ಣೀರ ಸ್ಪರ್ಶ
ನಿನಗಾಗಿ ಓಲೆ ಬರೆಯಲು ಕುಳಿತಾಗ ಇದೆ ಪುನರಾವರ್ತನೆ
ಹೇಳಲಾಗದು ನಿನಗೆ ನನ್ನ ಮನದೊಳಗಿನ ಯಾತನೆ
ಮುನಿಸ ತೋರುತಿದೆ ಲೇಖನಿ ಸಿಕ್ಕಾಗಲೆಲ್ಲ ನಾ ಬರೆವ ಸೂಚನೆ
ಅದಕ್ಕೂ ನೋವಿರಬಹುದು ಪದೇ ಪದೇ ಬರೆಯಲು ನೋವಿನ ನಿವೇದನೆ
ಪ್ರಕೃತಿಯ ಚೆಲುವಿಗೆ ಯಾವುದು ಸಾಟಿ
ಯಾರದು ಈ ಸೊಬಗಿನ ಸೃಷ್ಟಿಗೆ ಮೇಟಿ
ಅವನಿಗೆ ನನ್ನ ನಮನಗಳು ಕೋಟಿ ಕೋಟಿ
ಅತಿ ಅದ್ಭುತ ಅವನ ಈ ಸುಂದರ ಸೃಷ್ಟಿ
ಮತ್ತೆ ಹುಟ್ಟಿ ಬರುವ ಮುಳುಗೋ ರವಿ
ಸಾರುತಿರುವ ಏಳು ಬೀಳಲಿರುವ ಬಾಳ ಸವಿ
ಪೂರ್ಣ ಶಶಿಯಲ್ಲಿಯೂ ಕಲೆಗಳ ರಾಶಿ
ಅದರ ನಡುವೆ ಹಂಚುವ ಮನಸುಗಳಿಗೆ ಖುಷಿ
ಹಸಿರು ಕಾನನ, ಮಳೆಯ ಪ್ರೇಮ‌ಸಿಂಚನ
ನೀಲ ಗಗನ, ಭುವಿಯ ಪ್ರೀತಿ ಮಿಲನ
ಹಕ್ಕಿಗಳ ಚಿಲಿಪಿಲಿ ಇಂಚರ ಗಾನ, ನವಿಲ ನರ್ತನ
ಪ್ರಕೃತಿ ಒಡಲಲಿ ಸುಂದರ ಸಮ್ಮಿಲನ
ಬೆಳಗಿನ ಇಬ್ಬನಿ ಇರಬಹುದೆ ಕರಗುವ ಚಂದ್ರನ ಕಂಬನಿ
ಮೊದಲ ಮಳೆಯಲಿ ಮಣ್ಣು ಸುವಾಸನೆಯ ಖನಿ
ಬಾನಲಿ ಬೆಳ್ಳಕ್ಕಿಯ ಸಾಲು, ಮೇಘಗಳ ಮಾಲೆ
ಇಳೆಯಲಿ ಪಚ್ಚೆ ಪೈರು, ತಂಪು ಗಾಳಿ ಸ್ವರ್ಗ ಇಲ್ಲೆ
ನದಿಯ ಹರಿವು ಕಡಲ ಕಡೆಗಿನ ಒಲವು
ಧುಮುಕೊ ಜಲಪಾತ ಇಮ್ಮಡಿಸಿದೆ ಚೆಲುವು
ಝರಿಯ ಜುಳುಜುಳು ಗಾನವೇ ಸರಿ
ಬೆಟ್ಟ ಗುಡ್ಡಗಳ ಹಸಿರ ಸಾಲು ಸೌಂದರ್ಯಕೆ ಗರಿ