ನೆನಪುಗಳ ನೋವು ಮನದಿ ಮನೆಮಾಡಿರಲು,
ಹೇಳಲಾಗದೆ ಮನ ಮೌನವತಾಳಿರಲು,
ನಿನ್ನ ನೋಡವ ಆಸೆಯು ಮನತುಂಬಿರಲು,
ಗೆಳತಿ
ಎಲ್ಲಿ ಹುಡುಕಲಿ ನಾ ಈಗ ನಿನ್ನ ನೆಲೆ
ಕಾಯುತಿರುವೆ ಸದಾ ಆ ನಿನ್ನ ನೆನಪಲೆ.
ತಿರುಗಿ ಬರುವೆನೆಂದ ನನ್ನವಳು
ಬರುವ ಹೊತ್ತಾದರೂ ಬಾರದಾಗ,
ಬರುವ ದಾರಿಯ ಹಿಡಿದು ಹೊರಟೆ ಬರುವಳೆಂದು,
ಕಾಲ ಕಳೆದರೂ ಕಾಲು ಸವೆದರೂ,
ದಿನರಾತ್ರಿ ಸದಾ ಒಡುತಲಿರುವೆ ನನಸಲ್ಲದ ಆ ಕನಸುಗಳ ದಾರಿಯಲಿ...
ಮುಖವಾಡ ಬೇಕಾಗಿದೆ ನನಗೊಂದು,
ಚೆಂದನೆಯ ಆಕರ್ಷಕ ಮುಖವಾಡ,
ನೋಡಿದವರು ಮತ್ತೊಮ್ಮೆ ಮಗದೊಮ್ಮೆ
ನೋಡುತ್ತಲೇ ಇರಬೇಕು,
ಇವ ನಯ ನಾಜೂಕಿನವನೆಂದು ನಂಬಬೇಕು !
ನಯ ವಂಚನೆಗೆ ಹೇಳಿ ಮಾಡಿಸಿದಂತಿರಬೇಕು,
ರಾತ್ರಿ ಕಂಡ ಬಾವಿಗೆ ಹಗಲು ಬಿಳುವಂತಿರಬೇಕು.
ಬೇಕೇ ಬೇಕು ಮುಖವಾಡ,
ನಮ್ಮ ನೋವ ಮರೆಸಿ
ಹೊರಗೆ ಮುಗುಳ್ನಗೆ ಚೆಲ್ಲಲು
ದುಮ್ಮಿಕಿದ ಎರಡು ಹನಿ ಕಣ್ಣೀರು
ಪನ್ನೀರೆಂದು ಹೇಳಿ ನಂಬಿಸಲು !
ಆತ್ಮ ಬಂಧುಗಳು ಕೊಡುವ
ಕೊಡಲಿ ಏಟನು ತಾಳಿ,
ನೋವು ನಲಿವುಗಳನ್ನು ಮೀರಿ
ತನ್ಮಯತೆಯಲಿ ಬಾಳಿ,
ಜತನದಲಿ ಬಾಳ ಪಯಣವನ್ನು ಬೆಳೆಸಲು..
ಬೇಕೇ ಬೇಕಾಗಿದೆ ನನಗೊಂದು
ಸುಂದರ ಮುಖವಾಡ !
ಸಾಕಾಗಿದೆ ಈ ಬಣ್ಣ ಗೆಟ್ಟು ಸುಕ್ಕು ಬಿದ್ದ
ಆತ್ಮಾಭಿಮಾನದ ಕೆಟ್ಟ ಮುಖ.